БИШКЕК, 19-май — Sputnik. Соль-Илецкиден келген жарандар чуу чыгарганы үчүн үй карантинине чыгарылган жок. Бул туурасында саламаттык сактоо министринин орун басары Нурболот Үсөнбаев брифинг учурунда билдирди.
Анын айтымында, обсервациядагы мигранттар атайын бекитилген алгоритмге ылайык, эки жолу кайталап анализ алынгандан кийин чыгарылган.
“Мөөнөтү бүткөнгө чейин чыдабай нааразычылык билдиргени башка маселе. Биздин чечим обсервацияга алынгандардын маанайынан же башка факторлордон көз каранды эмес. Алар чуу чыгарабы же башка аракеттерди жасайбы, биз өзүбүздүн чараларды көрүп, алгоритмди аткарабыз. Обсервацияга жаткысы келбегени, өз акылына жараша тыянак чыгарганы менен эч нерсе өзгөрбөйт. Биз барып түшүндүрүү иштерин жүргүздүк, алар “бузук телефон” болуп кеткендиктен чуу чыгарышкан. Мындан кийин келгендер дагы биз бекиткен талаптарды так аткарууга милдеттүү болот”, — деди Үсөнбаев.
Ошондой эле ал обсервациядан чыккандарды жашаган регионуна жеткирүү үчүн атайын транспорт уюштурулганын белгиледи. Ар биринин уюлдук телефонуна тиркеме орнотулду, үй карантининде көзөмөлгө алынат. Обсервациядан чыгып бара жаткан жарандар өзүнө милдеттемелерди алып, кол кое турганы белгиленди.
ИИМ ал жайда кимдир бирөө жалган маалымат таратканын айтып, чынында үй карантинге эмес, COVID-19 жуктурганы аныкталгандар ооруканага которулганын билдирди.
Кечке жуук Саламаттык сактоо министрлиги аларды үй карантинине чыгарууга уруксат берген.
Коронавирустун кесепети
Кыргызстанда коронавирус жуктуруп алгандардын саны 1243 болду. Анын ичинен 898и айыгып, 14 киши каза тапкан.
Ушу тапта өлкө аймагында абал кандай болуп жатканын Sputnik жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
