БИШКЕК, 16-апр. — Sputnik. КРдин эл мугалими, педагогика илимдеринин доктору, профессор Исак Бекбоев дүйнө салды. Бул тууралуу президенттин маалымат кызматынан кабарлашты.
Исак Бекбоев 91 жашта болчу. Президент Сооронбай Жээнбеков баштаган өлкөнүн биринчи адамдары жана билим берүү, илим чөйрөсүндөгүлөр анын жакындарына терең кайгыруу менен көңүл айтышты.
"Бекбоев улуу педагог, илимпоз жана коомдук ишмер катары замандаштарынын эсинде калды. Анын басып өткөн өмүр жолу кесипкөйлүктүн бийик үлгүсү катары келечек муундар үчүн өрнөк болот деп ишенебиз. Маркумдун туугандарына жана жакындарына терең кайгыруу менен көңүл айтып, кайгысын тең бөлүшөбүз", — деп айтылат маалыматта.
Исак Бекбоев 1930-жылы 10-январда Нарын облусунун Ат-Башы районундагы Кара-Суу айылында төрөлгөн. 1948-жылы Кемин районундагы Жаңы-Алыш айылындагы мектепти медаль менен аяктаган. Жогорку билимди педагогикалык институттун физика-математика факультетинен алган.
Эмгек жолун 1952-жылы мектепте математика мугалими болуп баштайт. Андан кийин Кыргыз илим-изилдөө институтуна кабыл алынып, алгач кенже, кийин улук илимий кызматкер болуп иштеп жүрүп жетекчинин илимий иштер боюнча орун басарына чейин жеткен.
Бекбоев тогуз жыл Кыргыз мамлекеттик университетинде орто мектептердин директорлорунун билимин өркүндөтүү факультетинин деканы жана окуу-тарбия иштери боюнча проректору болуп эмгектенген.
Бекбоев математиканы окутуу боюнча окумуштуу-изилдөөчүлөрдүн кыргыз мектебинин негиздөөчүсү болуп саналат. Ал педагогика илимдеринин 23 кандидатын жана жети докторун даярдаган.
Кыргызстандын тарыхында биринчи жолу Бекбоев жана анын окуучулары тарабынан кыргыз мектептеринин 1-11-класстары үчүн математика боюнча оригиналдуу окуу китептер жазылган. Бул окуу китептер 2002-жылы Кыргызстандын илим жана техника боюнча мамлекеттик сыйлыгына татыктуу болгон.
Исак Бекбоев 200дөн ашык басылманын автору. Анын ичинде 11 монография, Кыргызстан үчүн 11 окуу китеби, 47 окуу жана окуу-методикалык колдонмолор бар.
Исак Бекбоевдин эмгеги мамлекет тарабынан жогору бааланып Ардак белгиси ордени (1971), "Даңк" медалы (2009), 3-даражадагы "Манас" ордени менен сыйланган, "КРдин эмгек сиңирген мугалими" наамы (1983), "КР эл мугалими" ардактуу наамдары ыйгарылган.
