Медетбеков: коронавирустан кем эмес терроризм коркунучу эске алынбай калууда
Террористтик жана экстремисттик уюмдардын коронавирус өңдүү биологиялык куралга ээлик кылуу үчүн умтулуусу күч. Алардын бул багытта атайын иштелип чыккан программалары да бар. Бул тууралуу Артур Медетбеков Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, терроризм менен экстремизм көп жылдардан бери белгилүү бир идеянын негизинде ишке ашып келет жана аны COVİD-19 өңдүү эпидемиядан улам токтоп калат деп айтууга болбойт.
"Бүгүнкү күндө дүйнөнү дүрбөлөңгө салган коронавирус пандемиясынан улам башка, ушундай эле олуттуу кесепеттерге алып келе турган коркунучтарга көңүл бурулбай калды. Бул өтө чоң жаңылыштык. Анын үстүнө интернет аркылуу желдей тарап жаткан маалыматтардын көптүгүнөн да коомчулуктун көңүлүн толугу менен COVID-19 вирусу ээлеп алды. Бирок ошол эле учурда буга чейин дүйнө элин сестентип келген терроризм жана экстремизм жоголуп кеткен жок. Алар, тескерисинче, учурдан пайдаланып күч топтоп жатышы да мүмкүн. Террористтик жана экстремисттик уюмдардын көп жылдардан бери коронавирус өңдүү биологиялык куралга ээ болууга умтулуп келгенин жакшы билебиз. Бул багытта алардын атайын иштеп чыккан программалары да бар. Мындан улам учурдагы абалды аталган уюмдар өз кызыкчылыгына колдонбойт деп эч ким кепилдик бере албайт. Ошол себептен терроризм коркунучуна олуттуу көңүл буруу керек", — деди Медетбеков.
Чекист ошондой эле Кыргызстанда да терс маанайдагы диний кыймылдардын мүчөлөрү бар экендигин айтып, алар да баш көтөрсө өлкөнүн бүтүндүгүнө чоң коркунуч жараларын кошумчалады.
