Сариев: парламенттик же президенттик башкаруу деп айтылбайт
"Президенттик" же "парламенттик" башкаруу деп айтылбайт. Бул тууралуу Акылбек Сариев Sputnik Кыргызстан радиосуна маек куруп жатып билдирди.
Анын айтымында, өлкөнүн башкаруу системасы Конституцияда так көрсөтүлгөн.
"Референдум өткөрүү боюнча сунушталып жаткан мыйзам долбоорунун маңызы боюнча менде бир топ суроолор жаралды. "Кыргыз Республикасынын мамлекеттик түзүлүшүн аныктоо боюнча референдум" деп коюптур. Мамлекеттик түзүлүшү боюнча Кыргызстан унитардык болуп эсептелет, ал эми башкаруу формасы "президенттик" же "парламенттик" деп айтылбайт. Биздин өлкө республикалык башкаруудагы мамлекет. Анын ичинен анан президенттик же парламенттик болуп бөлүнөт. Бул мына ушундай татаал мыйзам", — деди Сариев.
Ал мындай олуттуу мыйзамды сунуштоодо калк арасында түшүндүрүү иштеринин кенен жүргүзүлүшү керектигин кошумчалады.
Эскерте кетсек, ушул жылдын 1-апрелинде Жогорку Кеңештин депутаты Курманкул Зулушев 4-октябрга белгиленген парламенттик шайлоо менен чогуу мамлекеттин түзүлүшүн аныктоо боюнча референдум өткөрүү мыйзам долбоорун сунуштаган. Анда шайлоочулар өлкөнүн мындан ары президенттик же парламенттик мамлекет болушун тандоосу зарыл.
