Батырбекова: адам энергиясын туура пайдаланса узак жашайт

Дайыма тынчсызданып жүрүү адамдын саламаттыгына олуттуу зыянын тийгизет. Ошондуктан дүрбөлөңгө түшпөөгө аракет кылуу зарыл. Бул тууралуу Нуриза Батырбекова Sputnik Кыргызстан радиосуна маек куруп жатып билдирди.

Анын айтымында, адамдын саламаттыгына анын эмоциясы түздөн-түз таасир этет.

"Пандемиянын позитивдүү жагын деле алса болот. Мисалы, бизге кайрылгандардын көбү жумушунун көптүгүнөн үй-бүлөсүнө көңүл бурууга убактысы аздыгын жана дайыма чарчаңкы абалда жүрөрүн айтышат. Негизинен адам энергиясын туура пайдаланып жашаса, оңой эле 100гө чыга алат. Анан биз көп иштеп, чарчап, ар кандай терс эмоционалдык сезимдерге кабылганда энергиябыз ченемсиз короп, картая беребиз. Ошондуктан карантинди эс алууга, убакытты үй-бүлө менен өткөргөнгө жакшы мүмкүнчүлүк катары караса болот. Учурда коронавируска байланыштуу адамдар дүрбөлөңгө түшүп жатышат. Бул коркунуч, тынчсыздануу менен коштолууда. Мындай абалда организм абдан жабыр тартат. Энергиясы кетет. Андан көрө, мисалы, ата-энелер балдары менен өздөрү бала чакта ойногон оюндарын эстеп, ойносо болот. Ошол эле топ таш, тогуз коргол, шашки, шахмат, чатыраш оюндары, чогуу үй жыйноо, биргеликте даамдуу тамактарды жасоо бардык үй-бүлө мүчөлөрүнө кубаныч тартуулап, маанай көтөрөт. Ал эми балдар үчүн өмүр бою эсинен чыккыс жагымдуу сезимдерди тартуулайт", — деди Батырбекова.

Психолог жаңылыктарды тынымсыз окуп, угуп, ашыкча маалымат ала берүү дагы дүрбөлөңгө түшүүгө түртөрүн кошумчалады.