БИШКЕК, 15-фев. — Sputnik. Түркияда өтө турган Көчмөндөрдүн дүйнөлүк оюндарынын спорттук түрлөрүнө салбуурун кирбей калды. Бул туурасында Sputnik Кыргызстанга Салбуурун федерациясынын президенти Алмаз Акунов билдирди.
Анын айтымында, мындай чечимди КРдин Жаштар иши, дене тарбия жана спорт агенттиги чыгарган.
"Көчмөндөр оюндарына улуттук спорттун негизги делген жети түрү кирип, бирок салбуурунду алып салышыптыр. Бизде саясат, бизнес же бийлик жок. Максатыбыз — Кыргызстанга кызмат кылып, ата-бабадан калган улуу өнөрдү этноспорт катары калыптандырып, коомчулукка кеңири жеткирүү. Салбуурунду башкы спорт катары эсептебегенине нааразы болуп, программага киргизүүгө аракет кылабыз. Бизди катыштыруудан Түркия тарап баш тартып жаткан жок, чечимди Спорт агенттиги чыгарган”, — деди Акунов.
Ошондой эле ал салбуурунчулар буга чейинки Көчмөндөр оюндарына катышып, 2018-жылы 50дөн ашуун мамлекеттен жаачылар келгенин кошумчалады.
Жаштар иши, дене тарбия жана спорт агенттигинин маалымат кызматы Түркиянын Жаштар жана спорт министрлиги менен түзгөн меморандумда салбуурун спорттун түрүнө киргизилбей калганын тастыктады.
Көчмөндөрдүн дүйнөлүк IV оюндарына кыргыз улуттук спортунун жети түрү киргизилген. Алар — көк бөрү, эр эңиш, кыргыз күрөшү, ордо, тогуз коргоол, алыш бел боо күрөшү жана көчмөндөрдүн улуу күрөшү болмокчу.
