БИШКЕК, 13-фев. — Sputnik. Кыргызстанда куткаруучулар 12 миңден 25 миң сомго чейин маяна алат. Бул туурасында өзгөчө кырдаалдар министринин орун басары Калыс Акматов парламенттин жалпы жыйынында билдирди.
Бүгүн депутаттар "Кыйроодон куткаруу кызматтары жана куткаруучулардын статусу жөнүндө" мыйзамга өзгөртүүлөрдү киргизүү долбоорун карады.
Анда эл өкүлү Айнуру Алтыбаева куткаруучулардын маянасы жана аларга кандай социалдык жеңилдиктер каралганына казыкты.
"Куткаруучулар эмгек тажрыйбасына жараша 12 миңден 25 миң сомго чейин айлык алат. Бизге дагы аскер кызматкерлери сыяктуу эле социалдык жеңилдиктер каралган. Акысыз дарылануу жана реабилитациялоо жагы бар, эгер кызмат учурунда каза болсо, үй-бүлөсүнө компенсация төлөнөт. Ошондой эле турак жай дагы берилип жатат. Бул боюнча мамлекеттик структуралардын ичинен 3-орунда турабыз", — деди Акматов.
Ошондой эле Акматов техниканын 70-80 пайызы СССРден бери жаңылана электигин кошумчалап, быйыл Кытайдан 100 өрт өчүрүүчү техника алуу пландалып жатканын айтты. Андан тышкары, Кореянын эл аралык кызматташтык боюнча агенттиги үч жылдык программа менен 46 техника берсе, Жарандык коргонуу боюнча эл аралык агенттигинен да алынмакчы.
Өкмөт жылына ӨКМге жабдуу алуу үчүн 50 миллион сом бөлөт.
