БИШКЕК, 5-дек. — Sputnik. Жогорку Кеңештин депутаты Курманкул Зулушев Гапар Айтиев атындагы көркөм сүрөт өнөр музейинде уюштурулган "Феминале" көргөзмөсүндөгү учурларга ИИМ органдары кандай баа бергенине кызыкты.
Эске салсак, бир жума мурда аталган музейде өткөн көргөзмөгө жылаңач кыздар чыгып, алардын жоругу коомчулук тарабынан катуу сынга алынган. Анын айынан музейдин директору Мира Жангарачева кызматтан кеткен.
"Бала кезден баарыбыз билебиз, аял киши жылаңачтанып басмак турсун ич кийимин көрүнөө жайган эмес. Коомчулуктун дүрбөлөңгө түшүүсүнө негиз бар, маани беришибиз керек", — деди депутат.
Зулушев ошондой эле жосунсуз иш болгонун коомчулук жана депутаттар айтып жатканын белгилеп, укук коргоо органдары эмне кылып жатканын сурады.
"Ички иштер органдары Эреже бузуулар кодекси менен каттадыбы же Жоруктар кодексинин негизинде каттадыбы? Кандай баа берип жатат? Көркөм сүрөт музейи коомдук жай. Ошол коомдук жайда абийирин көрсөтүп басуу кантип бааланат? Бул маданиятпы же мыйзам бузуубу?" — деди ал.
Бүгүн парламентте дал ушул маселени депутат Махабат Мавлянова да көтөргөн болчу.
