БИШКЕК, 18-ноя. — Sputnik. "Кыргыз көмүр" мамлекеттик ишканасы Кара-Кечеде болгон кырсык мекеме иштеткен "Центральный" кенинин сыртында болгонун билдирди.
Эске салсак, 16-ноябрда Кара-Кече кенинде жүк ташуучу автоунаага жол көрсөтөм деп, алардын ортосунан чуркап өтүүгө аракет кылган кишинин машиналардын ортосуна кыпчылып калганы кабарланган. Жаракат алган 30 жаштагы киши ооруканага алып бараткан жолдо үзүлгөн.
"Кыргыз көмүр" ишканасы Кара-Кече кенинде 14төн ашык компания көмүр казарын маалымдап, алар иштеткен "Центральный" кенинде автотранспорттун кезеги сакталарын маалымдады.
"Кен казган жерге көмүр жүктөгөнү кирген автоунаалардын кирип чыгуусун жөнгө салуу тартиби бекитилип, көзмөлдөө пункту коюлган. Ал эми кароолчулар кезектешип иштеп, "Центральный" кенине документи жок кишилердин кирип кетпөөсүн текшерип турат", — деп айтылат маалыматта.
Мамлекеттик ишкана ошондой эле бардык айдоочуларды жол эрежесин сактап, кенге кирген автоунаалардын тыгынын жаратпоого чакырат.
