Тураров: СИП панелден курулган үйлөрдү ипотекага берүү планыбыз бар
Биздин компаниянын негизги көйгөйү курулуш тармагын мыкты билген адистердин жетишсиздиги болууда. Бул тууралуу Алмаз Тураров Sputnik Кыргызстан радиосунун "Стимул" программасында маек куруп жатып билдирди.
Анын айтымында, өкмөт ишкерлерге жеңилдик түзүп бербесе дагы бизнес-ассоциациялар көбүрөөк жардам көрсөтүшөт.
"Биз СИП панелден үйлөрдү курабыз. Бул тармактагы бизнести алгач атам баштаган. Жардам берип жүрүп, чогуу курулуш компаниясын негиздедик. Алгач чыгымдарды туура эмес эсептеп алып, колу билген жумушчу таппай, көп заказ алган учурда жетишпей артка кеткен күндөр болду. Учурда менеджментте төрт адам иштейбиз. Долбоорлорго жараша куруу иштеринде эң көп 50-60тай адам иштесе, эң азы 10-12 жумушчу эмгектенет. Алардын айлыгы орточо 25 миң сомду түзөт. Бизде курулушту бир айда бүтүрүү мүмкүнчүлүгү бар. Баалары да калктын ар кайсы катмарынын чөнтөгүнө туура келет. Алдыда үй курууга кеткен материалдарды чыгаруучу завод ачсам деген планым бар. Банктар менен келишим түзүп, мүмкүнчүлүгү жок адамдарга ипотекага турак жай салып берүүнү да ойлоп жатабыз", — деди Тураров.
Ал жакында Түркияда өтө турган курулуш материалдар көргөзмөсүнө катышып келүүгө камынып жаткандыгын кошумчалады.
