БИШКЕК, 15-окт. — Sputnik. 2020-жылы боло турчу дүйнө чемпионатынын тандоо турунун кезектеги оюнунда Кыргызстан менен Япониянын спортчулары беттешет.
Мелдеш 14-ноябрда Бишкектеги Дөлөн Өмүрзаков атындагы стадиондо өтөт. Беш күндөн кийин, 19-ноябрда, кыргызстандыктар кайрадан тажикстандык спортчулар менен ойномокчу. Учурда Япония, Тажикстан жана Кыргызстан тайпада лидер болуп саналууда.
Бүгүн, 15-октябрда, кыргызстандык спортчулар Улан-Батордогу мелдеште монголиялыктарды 2:1 эсеби менен жеңип алды.
Япония менен Тажикстандын командалары экиден оюн өткөрдү. Эми эки өлкөнүн спортчулары Душанбе шаарында бүгүн, 15-октябрда, Бишкек убактысы боюнча 18:15те талаага чыгышат. Кыргызстан менен Мьянма үч жолудан оюн өткөрсө, Монголия төрт ирет беттешкен. Жалпысынан командалар экинчи тандоо турунда сегиз ирет ойношу шарт.
Курама команда буга чейин Бишкекте өткөн мелдеште Мьянманын футболчуларын 7:0 эсебинде утуп, тандоо турундагы алгачкы жеңишин камсыздаган. Биринчи оюнда кыргызстандыктар 0:1 эсеби менен тажикстандыктарга жеңилип калганы маалым.
Монголия биринчи оюнунда Мьянманы 1:0 эсеби менен утуп, кайра эле ушундай эсеп менен Тажикстандан жеңилип калган. Андан соң Японияга 0:6 эсебинде утулган болчу.
