БИШКЕК, 28-сен. — Sputnik. Кыргызстандык спортчу Адилет Камчыбеков Японияда өткөн пауэрлифтинг боюнча дүйнө кубогунан коло медаль алды. Бул тууралуу Жаштар иши, дене тарбия жана спорт агенттигинен кабарлашты.
Мүмкүнчүлүгү чектелген спортчулар арасындагы мелдеш 25-27-сентябрь күндөрү Токио шаарында өткөн. Камчыбеков 107 килограммдан өйдө салмактагылар арасында күч сынашкан.
"Кыргызстандык спортчу 175 килограмм штанганы көтөрүп, үчүнчү орунга ээ болду. Алтын байгени 221 килограммды көтөрүү менен түштүккореялык Чун Кен Бае, ал эми күмүш медалды 200 килограмм оордукту көтөрүп грузиялык Иаго Горгодзе тагынды", — деп айтылат маалыматта.
Мындан тышкары, өлкө атынан дүйнө кубогуна катышкан Максат Аргымбаев бешинчи орунга татыса, Жыргалбек Оросбаев медалсыз калган.
Турнирдин алкагында кыздар жана эркектер арасында медалдын 19 комплектиси ойнотулду. Ага жалпысынан 13 мамлекет катышкан.
