БИШКЕК, 3-сен. — Sputnik. "Ош" базарында 500гө чукул соодагер чогулуп Бишкек шаарынын мэри Азиз Суракматовдун келишин талап кылууда.
"Берекет универсал" базарында иштегендер бүгүн, 3-сентябрда, нааразычылык акциясына чыгышты.
"Бул жайды "Берекет" компаниясынан чыгарып, муниципиалдык базар кылышын талап кылып жатабыз. Анткени бул жер мэрияга караштуу. Компания электр энергиясын үзүп кеткен. Апрелден бери базарды күнү-түнү өзүбүз коруп отурабыз. Азыр мэр келсе, эмнеге жеке адамдын кызыкчылыгын коргоп жатасыздар деген суроону беребиз", — деди базардын кызматкери Махмуд Губайдулин.
Эскерте кетсек, "Берекет универсал" кичи базарын жаап, ал жерге соода комплексин куруу пландалууда. Буга каршы болгон соодагерлер митингге чыгып, мамлекеттик органдарга кайрылып келишет. Алар эгер базар жабылса, кайда барабыз деп нааразы.
Базар жетекчилиги мурда өрттөнгөн базардын ордуна курулган имараттын ичинен күркө сатып алууну сунуштаган. Бирок соодагерлердин айтымында, анын 1 чарчы метри — 1500 доллар. Мындан сырткары, күн сайын ар бир чарчы метрине 50 сомдон ижара төлөшү керек. Эгер 10 чарчы метр жерде иштесе, ижарага айына 15 000 сом кетет.
