Бүгүн, 3-сентябрда, "Берекет универсал" кичи базарында иштеген 500гө чукул адам чогулуп, мэр Азиз Суракматовдун келишин талап кылышкан. Бирок мэр базарга барган жок, анын ордуна вице-мэр Азиз Алымкулов менен Ленин районунун акими Токтосун Султанов келди.
Көйгөйдү уккан эл өкүлдөрү ушул убакка чейин аны чечпей, кырдаалды курчутуп жибергени үчүн шаар бийлигине кине койду. Алар жагдай менен толук таанышып чыгып өз көзөмөлүнө ала тургандыктарын айтышты.
Ал эми вице-мэр "Берекет универсал" кичи базарын муниципалдык базарга айлантуу талабын карап чыгууну убадалады. Тосулган жолду ачуу, электр энергиясын улап берүү маселесин чечүү үчүн соодагерлердин төрт өкүлүн алып мэрияга кетишти.
Натыйжада чогулган эл бир жуманын ичинде бийликтен алгылыктуу жооп болбосо жөө жүрүш менен Ак үйгө чейин барышарын айтып тарап кетишти.
Митингге чыккандардын талабы:
— "Берекет универсал" кичи базары жайгашкан жер мэрияга карагандыктан жеке адамга таандык "Берекет" компаниясынын карамагынан чыгарылсын. Эгер муниципалдык базарга айланса, мэрияга бир айда ижара акысынан эки миллион сом түшөт;
— Апрель айында базар жетекчилиги өчүрүп кеткен электр энергиясын кайра кошуп берүү;
— Базарга кетчү жолго коюлган тоскоолдуктарды (жабылган көпүрөнү, тосулган жолду ачуу) алып салуу.
Базар жетекчилиги мурда өрттөнгөн базардын ордуна курулган имараттын ичинен күркө сатып алууну сунуштаган. Бирок соодагерлердин айтымында, анын бир чарчы метри — 1500 доллар. Мындан сырткары, күн сайын ар бир чарчы метрине 50 сомдон ижара төлөшү керек. Эгер 10 чарчы метр жерде иштесе, ижарага айына 15 000 сом кетет.
