БИШКЕК, 13-авг. — Sputnik. Ысык-Көл облусунун Чолпон-Ата шаарында өткөн аялдар арасындагы бильярд боюнча дүйнө чемпионатында россиялык Элина Нагула жеңүүчү аталды.
Чечүүчү оюнда ал мекендеши, планетанын көп жолку чемпиону жана эл аралык "Пирамида" конфедерациясы аттуу дүйнөлүк рейтингдин биринчи сабында турган Диана Миронованы 5:0 эсебинде жеңип алды.
"Бул оюнга катуу даярдык көргөм. Дүйнө чемпионатынын финалына күнүгө эле чыга бербейсиң да. Жакшы оюн көрсөткүм келди. Жеңип алганыма абдан кубанып турам", — деди Нагула.
Ал эми турнир 8-август күнү Чолпон-Ата шаарында башталган. Иш-чараны эл аралык "Пирамида" конфедерациясы менен Евразия экономикалык биримдиги Кыргызстандын өкмөтүнүн колдоосу менен уюштурду.
Мелдешке 25 өлкөдөн келген 80ден ашуун спортчу катышты. Кыргызстандын намысын дүйнөнүн үч жолку чемпиону Каныбек Сагынбаев менен 2015-жылы 18 жашында дүйнө биринчилигин жеңип алган Дастан Лепшаков коргоду.
Эң мыкты көрсөткүчтү коло медаль тагынган Азиз Мадаминов көрсөттү.
