Министрдин орун басарын Атамбаевдин Кой-Таштагы үйүнө киргизбей коюшту

БИШКЕК, 22-июл. — Sputnik. Ички иштер министринин орун басары Мирлан Каниметов мурдагы президент Алмазбек Атамбаевдин Кой-Таш айылындагы үйүнө келди. Бул тууралуу Sputnik Кыргызстан агенттигинин кабарчысы жеринен билдирди.

Ал Кой-Таш айылына ИИМдин тергөө тобунун жетекчиси менен чогуу барган. Атамбаев буга чейин суракка келүү боюнча үч ирет кат түрүндө билдирүү алган. Бирок мурунку президент бийлик мыйзам жолуна түшмөйүнчө сурак берүүгө барбай турганын билдирген.

Каниметов менен Атамбаевдин кеңешчиси Кундуз Жолдубаева жолукту. Ага тергөөчүлөр Атамбаевди кримтөбөл Азиз Батукаевдин бошотулушу боюнча иштин алкагында суракка алганы келишкенин айтышты. Жолдубаева өз кезегинде буга чейин келген билдирүү каттарынын баары мыйзамсыз экенин белгиледи. Андан сырткары, Жогорку Кеңештин Атамбаевди экс-президент статусунан ажыраткан чечимин Конституциялык палатага даттанышканын маалымдады.

"Арызды ноябрь айында карашат. Ага чейин Атамбаев милицияга басып да барбайт", — деди ал.

Министрдин орун басары журналисттерге Атамбаевдин үйүнө "сотко чейинки тергөө иштеринин алкагында" келгенин билдирди.

"Тергөө үч жолу билдирүү катын жиберди. Бирок бүгүнкү күнү Атамбаевдин өзү да, анын өкүлдөрү да суракка келген жок", — деди Каниметов.

Ал ошондой эле журналисттердин "Атамбаевди күч менен алып баруу болобу?" деген суроосуна, "бардыгын тергөөчү мыйзам негизинде чечет" деп жооп берди.

Атамбаевдин статусунан ажырашы

Эске салсак, Жогорку Кеңеш Алмазбек Атамбаевди кол тийбестигинен ажыраткан. Башкы прокурор Өткүрбек Жамшитов парламенттеги депутаттык комиссия койгон алты күнөөнүн бешөө негиздүү экенин ырастап, бул боюнча өзүнүн корутундусун дагы билдирген. 

Алар: Кой-Таш айылындагы жер тилкесин мыйзамсыз алуу, кримтөбөл Азиз Батукаевдин мыйзамсыз бошотулушуна, акча адалдаган "Ака инвест" сыяктуу бир нече компанияга тиешеси бардыгы, Бишкек ТЭЦин реконструкциялоодогу коррупциялык иштер жана ТЭЦке көмүр ташыган компаниянын кызыкчылыгын коргоо маселеси.

Батукаевдин иши

Азиз Батукаев 2006-жылы баңгизатты мыйзамсыз сактоо, жарылуучу заттарды жана курал-жаракты мыйзамсыз алып жүрүү, массалык башаламандык уюштуруу боюнча айыпталып, 16 жылга эркинен ажыратылган. 2008-жылы абак тартибин бузганы үчүн жаза мөөнөтүнө дагы эки жыл кошулуп, Нарындын №24 абагына которулган. Бирок 2013-жылдын 9-апрелинде оор дартка кабылганына байланыштуу делип бошотулуп, Кыргызстандын аймагынан Грозныйга учуп кеткен. 2014-жылдын 20-майында КР Жаза аткаруу мамлекеттик кызматы Батукаевге эл аралык издөө жарыялаган. ИИМдин маалыматы боюнча, учурда Батукаев курал-жарак сактаганы үчүн үч жылга эркинен ажыратылып, Чечен Республикасында жаза мөөнөтүн өтөп жатат.
2019-жылы апрелде башкы прокурор Өткүрбек Жамшитов ЖК жыйынында криминалдык авторитет Азиз Батукаевдин иши кайра жанданганын билдирген.