БИШКЕК, 19-июл. — Sputnik. Бишкек мэри Азиз Суракматов түркиялык "Анадолу групп" холдингинин жетекчиси Тунджай Озильхан менен Бишкекке 500 автобус сатып алуу боюнча меморандумга кол койду. Бул тууралуу муниципалитеттин маалымат кызматы кабарлады.
"Тунджай Одильхан Түркиядагы эң ийгиликтүү ишкерлердин бири. Анын байлыгы 1,6 миллард долларга барабар. Ал Бишкек мэриясына 15 жылдык мөөнөт менен 1,7 пайыздык жеңилдетилген насыя берүүгө ниеттенип жатат. Буга мэрия 500 автобус сатып алууну пландоодо", — деп айтылат билдирүдө.
Алдын ала маалыматтар боюнча, кеп "Анадолу Исузу" компаниясы жасап чыккан автобустар жөнүндө болуп жатат. Бул Япония-Түркия биргелешип ачкан алгачкы автомобиль куруучу ишкана. Ал 26 өлкөгө автоунаа экспорттойт.
Бишкекти маршруттук таксилерден бошотуу үчүн мэрия 800дөн 1000ге чейин автобус сатып алышы керек. Бул тууралуу Sputnik Кыргызстан агенттигине Шаардык транспорт башкармалыгынын жетекчи орун басары Нурлан Атыканов айтып берген.
