Искендер Матраимовдун ишкер жубайы Минавар Жумаева тууралуу 5 факты

Дегеним, "Азаттык" радиосунун "Кыргызстандан чыгарылган миллиондордун изи" деп аталган иликтөөсүндө анын дагы бир нече бизнеске ээлик кылары айтылды.

Муну депутат Матраимов өзү тастыктап, аялы 1995-жылдан бери ишкерлик менен алектенерин белгиледи.

Депутаттын жубайы Жумаева тууралуу ЖМКларда дээрлик жазылган эмес. Андыктан жолдошунан жана ачык булактардан алынган маалыматтарды сунуштайбыз.

Жашы жана жашаган жери

Минавар Жумаева 1963-жылдын 26-мартында туулган. 2017-жылкы президенттик шайлоодо Ош шаарынын шайлоочуларынын тизмесинде болгон. Ал эми депутаттын өзүнүн айтымында, азыр үй-бүлөсү менен Бишкек шаарында турат.

Үй-бүлөсү

Төрт баланын энеси. Уулдарынын улуусу — Мирланбек Исмаилов. ЖМКлар анын Тышкы иштер министрлигинин түштүк регионалдык өкүлчүлүгүнүн жетекчиси экенин жазышкан. 33 жаштагы жигит Матраимов деген фамилиясын өзгөртүп, чоң атасынын ысымына өткөн. Ал эми экинчи уулу ишкерлик кылат. Атасынын айтымында, жубайы көзөмөл кылган бизнес ушул баласына бой жеткенде өткөн. Баса, депутат 3-июнь күнү 5-каналдын түз эфиринде сүйлөп жатып, Ош шаарындагы эки "Народный" дүкөнү анын үй-бүлөсүнө тиешелүү экенин моюндады. Уулдарынан тышкары, жубайлардын эки кызы бар.

Санабар Бахапованын кызы эмес

Буга чейин жергиликтүү ЖМКлар депутат Искендер Матраимов Мамлекеттик мүлк комитетинин мурдагы жетекчиси Санабар Бахапованын күйөө баласы экенин айтып дагы, жазып дагы келишкен. Бирок бул маалыматты 4-июнь күнү эл өкүлү өзү төгүндөгү. Анын айтымында, Минавар Жумаева Санабар Бахапованын кызы эмес. Бирок депутат мындай сөз аларды эмнеге ээрчип жүргөнүн түшүндүргөн жок.

Юстиция министрлигинде катталган мүлкү

Юстиция министрлигинин расмий сайтындагы маалыматтарга караганда, Жумаева Минавар Шабыевнанын атына үч ишкана катталган. Алардын бири — "АвтоСТОлица" ЖЧКсы, кыймылсыз мүлктү башкаруу менен алектенет деп көрсөтүлгөн. Негиздөөчүлөрү — Канатбек Маматов менен Минавар Жумаева. Экинчиси — "Пальма и К" ЖЧКсы. Шаар ичинде жана сыртында эл ташуу менен алектенген бул ишканага жалгыз гана Минавар Жумаева ээлик кылары айтылган. Негиздөөчү жана жетекчиси да өзү. Депутаттын жубайына "Ош-Плаза" ЖЧКсы дагы таандык. Ал кеңири колдонулуучу товарларды сатары көрсөтүлгөн.

factcheck.kg сайтынын жазганына караганда, "АвтоСТОлица" ЖЧКсы "Эльдорадо" соода борборуна ээлик кылат. Ушул эле сайттын Politmer менен биргеликте даярдаган материалында Жумаеванын Асанбай кичи районунда 176,9 чарчы метрлик батири бар экени айтылган. Бул жерде депутат "2018-жылы сатып алганбыз" деген үй тууралуу сөз болуп жатышы мүмкүн.

Декларациядагы мүлкү

Декларацияга депутаттар менен аткаминерлер өздөрүнүн гана эмес, жакын туугандарынын дагы мүлкүн көрсөтүшү милдет. 2017-жылкы мүлкүнө депутат жакын тууганы катары жубайын көрсөткөнүн айтты. Анда Жумаева 2 миллион 155 миң сом иштеп тапкан экен. Мындан тышкары, анын 1,4 миң чарчы метрлик турак үйү (кайсы экени көрсөтүлгөн эмес) жана 1,5 миллион сомго бааланган акциясы бар.