БИШКЕК, 23-апр. — Sputnik. Литвалык "Гарсу пасаулис" (Garsu pasaulis) Кыргызстанды эл аралык арбитраждык сотко берүү үчүн даярдыктарын баштады. Бул тууралуу Sputnik Кыргызстан агенттигине аталган компаниядан билдиришти.
"Бул жолугушуулар күнүмдүк иш тартиптин бир бөлүгү. Бирок биз УКМКнын жалпыга маалымдоо каражаттарына кармалган жарандар биздин кызыкчылыкты коргогон деп тараткан маалыматын окуп алып аябай таң калдык. Бул биз үчүн абдан олуттуу айыптоо жана ошол эле учурда курулай калп... Жөн гана таанышуу кызыкчылыкты коргоого жатпайт жана эч кандай күнөөсү жок кишилерге кылмыш ишин козгоого жана тендердин жыйынтыгын жокко чыгарууга негиз да болбойт", — деди компаниянын башкы директорунун кеңешчиси Витаутас Меляускас.
"Гарсу пасаулис" компаниясынын белгилешинче, алардын Бишкектеги өкүлү канчалык аракет кылганына карабастан Улуттук коопсуздук мамлекеттик комитети кызматташууга барбай, алардын сунуштарын көңүл сыртында калтырып жатат.
Компания ошондой эле өздөрүнүн ар-намысын коргоо үчүн Кыргызстандын сотуна жана эл аралык арбитражга кайрылууну ойлонуп жатканын билдиришти.
"Биздин адвокаттар Кыргызстанга каршы өз кызыкчылыктарыбызды эл аралык инвестициялык арбитражда коргоо үчүн даярдыктарды баштады", — деп айтылат маалыматта.
Мамлекеттик каттоо кызматынын тендер чуусу боюнча мамлекет башчы Сооронбай Жээнбеков дагы өз пикирин билдирген болчу.
