БИШКЕК, 27-фев. — Sputnik. Экстремалдык геосаясий журналистика тармагындагы Юлиан Семенов атындагы эл аралык сыйлыктын ээси, репортер, фотограф, РИА Новости агенттигинин баяндамачысы Вера Костамо Кыргызстандагы төрт университеттин журналистика факультетинин студенттерине мастер-класс өткөрдү.
Аталган иш-чара Sputnik Кыргызстан агенттигинин мультимедиалык маалымат борборунда өттү.
Костамо жакындарынан айрылган кишини кантип кепке тартуу керектиги тууралуу да айтып берди.
"Кырсык болгон жерге келип жакындарынан айрылган киши менен сүйлөшүп жатасыз дейли. Эгер мүмкүн болсо, аны менен бир сааттай сүйлөшүңүз. Анткени жан дүйнөсү жабыркап турган киши ушунча убакыттан кийин ачылып сүйлөп бере баштайт. Сиз да оор делген суроолорду бере аласыз. Кишилер менен көпкө сүйлөшүп тургандан тартынбагыла", — деди Костамо.
"Кишинин психологиясы ушундай жаратылган дейсиз, сүйлөшүп жаткан учурда пайда болгон тынчтыкты жактырбайбыз жана бул абалдан чыгуу үчүн ар кандай аракеттерди кылабыз. Андыктан мындай учурларда кишилер ойго келбеген кызыктуу фактыларды, маалыматтарды айтып жибериши мүмкүн", — деди ал.
Костамо маекти маңдай-тескей отуруп алууну сунуштайт.
"Эгер телефон чалбай эле ал киши менен жолугуп маек алууга мүмкүнчүлүк болсо, аны сөзсүз пайдалангыла. Анткени телефон аркылуу сүйлөшкөн менен жолугуп алган маектин асман менен жердей айырмасы бар. Ал эми социалдык тармактан жазышуу таптакыр башка. Себеби берилген суроолордун жообу сиздин көз алдыңызда болот. Андыктан ал маалыматты кылдаттык менен текшерүү керек", — деди журналист.
SputnikPro — бул Россиянын мыкты медиа-менеджерлеринин жана алдыңкы адистеринин презентация жана мастер-класстары. Алар өз тажрыйбаларын журналисттер, маалымат катчылар, жогорку курстун студенттери менен бөлүшөт.
Белгилей кетсек, SputnikPro долбоору 2018-жылы жазында башталып, Белоруссиянын, Грузиянын, Азербайжандын, Армениянын жана Кыргызстандын медиа коомчулугунун жогорку баасын алган.
