БИШКЕК, 18-фев. — Sputnik. Кытайдагы 334 килограммдык Ван Хаонань аттуу эң семиз бала жарым жылдын ичинде 142 килограмм таштаганын РИА Новости жазды.
Билдирмеге караганда, Хаонань эки сантиметрге өсүп, буту төрт размерге кичирейген. Ал мындай натыйжага ашказанын кичирейтүү үчүн операция жасатып, тамактануусун жөнгө салып, машыга баштагандан кийин жетишкен.
"Шаньдун провинциясындагы 19 жаштагы баланын салмагы 2018-жылы 334 килограмм болчу. Ошол жылдын май айында жергиликтүү медициналык университет менен ондогон ооруканалар "Биринчи семиз адамды табуу" деген кампания жарыялап, үч бейтапты бекер дарылоого убада берген", — деп айтылат маалыматта.
Дарыгердин айтымында, операция тамак сиңирүү процессине терс таасирин бербейт. Бейтап болгону азыкты майдалап чайнашы керек болот. Ашыкча салмактын кесепетинен баланын боору, жүрөгү жана өпкөсү жабыркап келген. Дарыгер билдиргендей, бейтаптын абалы жакшырып калды.
Ван Хаонан болсо туура тамактануу менен машыгуулар ага жакшы жардам берип жатканын билдирди. Учурда анын салмагы 192 килограмм. Эми дагы 100 килограмм таштоону пландап жатат.
