БИШКЕК, 31-янв. — Sputnik. Жогорку Кеңештин депутаты Өмүрбек Бакиров Айыл чарба, тамак-аш өнөр жайы жана мелиорация министрлигин жоюп, Суу чарба департаментине кошуп салуу керектигин парламенттин жалпы жыйынында билдирди.
Анын айтымында, министрлик пландуу иштерди аткарбай, жалаң гана статистикалык маалыматтарды отчет катары берген.
"Силер эч кандай саясат жүргүзгөн жоксуңар, статистика менен гана чектелип жатасыңар. Айыл өкмөттөн статистиканы аласыңар да бул жакка отчет кылып бересиңер. Айылда эл эмне эгип, эмне тигиш керектигин билбейт. Силер аларга ушул нерсени эккиле деп айтпайсыңарбы? Картошка эмне болду мына", — деп депутат ачууланды.
Ал ошондой эле илгери союз маалында ар бир колхоз, совхоздо агроном болуп, алар элге туура багыт берип келгенин кошумчалады.
Өз кезегинде айыл чарба, тамак-аш өнөр жайы жана мелиорация министринин орун басары Жаныбек Керималиев депутаттын айткандары менен макул эместигин, ошол беш миң кызматкердин 65 пайызы айыл жергесинде иштей турганын айтты.
Буга чейин да Жогорку Кеңештин депутаты Экмат Байбакпаев министрликти жоюп салуу маселесин көтөргөн болчу.
