БИШКЕК, 20-янв. — Sputnik. Эртең абдан кызыктуу оюн болот. Бул тууралуу Кыргызстандын курама командасынын машыктыруучусу Александр Крестинин билдирди.
Футбол федерациясынын маалыматы боюнча Кыргызстан — БАЭ матчынын алдында маалымат жыйын өткөн.
Крестининге алдыда боло турган оюн, чабуулчу Виталий Люкс тууралуу жана башка бир катар суроолорду беришти.
Машыктыруучунун айтымында, кызыктуу оюндар эми башталууда, мунун жоопкерчилиги да күч.
"Эртең биздин кызыктуу таймаш күтүп турат. Биз БАЭ командасынан айырмаланып, башкача көз караштабыз. Ушу тапта чабуул менен коргонуунун ортосундагы балансты табууга аракет кылып жатабыз. Бул — маанилүү учур. Чабуул жакшы болбосо жеңээриң күмөн", — деди ал.
"Атаандаштардын биздин ыкманы жана Виталий Люксту иликтеп-изилдеп жатканы кадыресе көрүнүш. Ушундай болушу керек. Биз да аларды карап жатабыз. Ооба, алар талаа ээси, бирок бул эч нерседен кабар бербейт. Турнирди оюн өтүп жаткан жердин футболчулары жеңип аларына эч кепилдик жок. Албетте, аларга туулган жердин деми жардам берет, бирок биздин күйөрмандар да жетиштүү. Биз өзүбүзгө бекем ишенебиз. Эртең силерди таң калдыра турган оюн көрсөтөрүбүзгө ишенип койгула", — деди ал.
Виталий Люкс тууралуу
"Филиппиндиктер менен ойногондо ийгилик биз тарапта болду. Бул жакшы. Люкс ошол эле Кытай менен беттешкенде да жеңишти камсыздай алмак, бирок андай болбоду. Ар кандай болот экен. Биз команда менен чогуу иштеп жатабыз, Люкс үчүн эртеңки күн да ийгиликтүү болоруна ишеним артам", — деди Крестинин.
Күйөрмандар тууралуу
Крестинин Кыргызстан да чейрек финалга өтчү командалардын арасында болушу керектигин, бул үчүн ал бардык күч-аракетин жумшап жатканын белгиледи.
Эскерте кетсек, таймаш 21- январь күнү Бишкек убактысы менен саат 23.00дө Абу-Даби шаарында өтөт.
