БИШКЕК, 17-янв. — Sputnik. Жогорку Кеңештин депутаты Тазабек Икрамовдун "Билим берүүнүн мыктысы" төш белгисин алышы социалдык тармакта талкуу жаратты. Анын билим берүүгө кошкон салымына кызыккандар көп.
Икрамов 1998-2000-жылдары Кыргыз мамлекеттик дене тартбия жана спорт институтунун Жалал-Абад облусундагы филиалында дене тарбия мугалими болуп иштеген. Андан кийин билим берүү тармагында эмгектенген эмес.
Эл өкүлүнө өткөн жылдын аягында Билим берүү жана илим министри тарабынан "Билим берүүнүн мыктысы" төш белгиси берилген. Муну коомчулук таң калуу менен кабыл алды.
Икрамов социалдык тармактагы баракчасына мындан башка дагы сыйлыктарынын сүрөтүн жарыялаган. Ал жактан депутатты маданият, маалымат жана туризм министри Республиканын маданиятына жана искусствосуна кошкон салымы үчүн Ардак грамота менен сыйлаган.
Мындан сырткары, депутатка өкмөттүн алдындагы Миграция кызматынын "Шериктештик үчүн" төш белгиси да ыйгарылган.
Кыргыз парламентинин 80 жылдык мааракесинин урматына бир катар депутаттарга Жогорку Кеңештин Ардак грамотасы жана энчилүү сааттары берилген. Мында Икрамов Ардак грамота менен сыйланган.
Тазабек Икрамов муну менен эле чектелбей, жергиликтүү жалпыга маалымдоо каражаты тарабынан эки ирет "Жылдын мыкты депутаты" дипломун алган.
