БИШКЕК, 5-дек. — Sputnik. Бишкекке жакын жерден 1-класстын окуучусун Казакстандын номери табылган жүк ташуучу автоунаа коюп кетип, аны 10 метрдей жерге сүйрөп барган. Бул тууралуу Чүй облустук ЖКККББдин маалымат кызматы билдирди.
Окуучу кыз мектептен чыгып, жолду кесип өтүп бараткан жеринен машина сүзүп кеткен.
Жол кырсыгы бүгүн, 5-декабрда, саат 12:00дөр чамасында Аламүдүн районундагы Ленин айылында болгон. 6 жашар кыз кырсык болгон жерден каза болгон. Mercedes-Benz үлгүсүндөгү жүк ташуучу автоунаа айдап бараткан жаран Казакстандын тургуну. Учурда ал кармалып, милиция бөлүмүнө алынып келди. Тийиштүү экспертизалар дайындалды.
