БИШКЕК, 14-ноя. — Sputnik. Жогорку Кеңештин депутаты Карамат Орозова ӨКМ авариялык абалда деп корутунду чыккан мектептерде эмнеге балдар окутулуп жатканына кызыкты.
Вице-премьер Алтынай Өмүрбекова, тилекке каршы, андай учурлар бар экенин айтты.
"Эгер ошондой корутунду болсо, ал имарат консервация болуп пайдаланууга тыюу салынышы керек эле. Бирок башка жайгаштыра турган жер жок болуп, кээ бир авариялык абалда турган мектептерде балдар окуп жатат, аны мойнубузга алабыз", — деди Өмүрбекова.
Депутаттын балдардын коопсуздугуна ким жооп берет деген суроосу жоопсуз калды.
Учурда Жогорку Кеңеште "Өкмөттүк саат" өтүп жатат. Анда республикада мектепке чейинки билим берүү жана жалпы билим берүү уюмдарынын имараттарын куруу талкууланууда.
