"Саманчынын жолу" спектакли күнүнө эки-үч ирет коюлган учурлар болот. Бул тууралуу Назым Меңдебаиров Sputnik Кыргызстан радиосунун таңкы эфиринде маек куруп жатып билдирди.
Анын айтымында, Чыңгыз Айтматовдун чыгармаларына көрүүчүлөр тарабынан ар дайым кызыгуу болуп келет.
"Улуу жазуучубуз Чыңгыз Айтматовдун 90 жылдык маарекеси театр айдыңында да кызуу белгиленүүдө. Анын чыгармаларынын негизинде коюлган спектаклдер ар дайым суроо-талапка ээ. Айта кетсем, "Саманчынын жолу" спектакли айрым күндөрү эки-үч ирет коюлат. Андан сырткары, быйыл репертуарыбызга Бактыгүл Чотурованын калеминен жаралган "Рамаяна" эпосун сахналаштыруу кошулду. Эпостун баарын камтый албасак дагы түпкү тамырын, сюжетин ачып берүүгө аракет кылуудабыз", — деди Назым Мендебаиров.
Ал маянанын аздыгынан улам театрда иштеген таланттуу жаштар чет жакка иштеп кетүүгө мажбур болуп жатканын кошумчалады.
