Крис Рейнир буга чейин ондогон өлкөлөрдө болуп, быйыл Кыргызстанга келди. Ал негизинен жаратылыш менен элдин түпкү маданиятын кадрга түшүрүп, эмгектери дүйнө музейлеринде көрсөтүлүп келет. Ал кыргыздар улуттук кийимдерин сыймыктануу менен киерин байкаган.
"Мен Кыргызстанга 20 жылдан бери келүүнү пландап жүргөм. Максатым маданияты бай элдин кийимин сүрөткө түшүрүү. Көп жерде болдум. Айрым эл кийимин, баалуулуктарын сактай албай унутуп калганын байкадым. Бирок кыргыздар өздөрүнүн улуттук кийимдерин сыймыктануу менен киет экен. Кыргыз кийими оймо-чиймеси, жасалгасы, зер буюмдары менен өтө айырмаланып турат. Бул жактан тарткан сүрөттөрүмдү National Geographic журналына чыгарам. Ошондой эле музейге коюп, китепке кошобуз. Анткени мындай улуттук кийимдерди башка эл, кийинки муун көрүшү керек", — деди Крис Рейнир.
Кыргызстанга келген сүрөтчү өзүнүн тилегин "Кийиз дүйнө" коомдук фонду менен биргеликте ишке ашырган.
Эми ал коңшу Тажикстан, Өзбекстанга да барып жергиликтүүлөрдү сүрөткө тартат.
