БИШКЕК, 17-сен. — Sputnik. Москванын Новочеркасский бульварында унаага тебеленген кыргызстандыктардын үчөө дагы деле ооруканада, баарынын тең абалы оор бойдон калууда. Бул тууралуу Sputnik агенттигинин кабарчысына Кыргызстандын Россиядагы элчилигинин маалымат катчысы Гүлбарчын Байымбетова билдирди.
Бир нече убакыт өткөндөн кийин НТВ каналы Бекжан Сарбишевди кырсыкка чейин топтошкон балдар уруп жаткан видеону жарыялаган.
Байымбетованын айтымында, кырсыктан кийин жандандыруу бөлүмүнө жаткырылган беш кыргызстандыктын экөөнүн абалы турукташып, үйгө чыгарылды.
Ал эми шектүү катары кармалган Сарбишевге элчилик юридикалык жардам берүүгө даяр экенин кошумчалады.
"Эки айга камакка алынган Сарбишев тараптан жардам сурап бизге эч ким кайрыла элек. Бирок элчилик анын мекендеш экенин эске алып юрист берүүгө даяр", — деди Байымбетова.
Ошондой эле маалымат катчы кырсыкта каза болгон кыргыз жаранынын сөөгүн мекенине жеткирүүгө документтерди даярдоого жардам берилгенин билдирди.
