БИШКЕК, 17-авг. — Sputnik. Адамдардын кыйынчылыгын бизнес жасоо үчүн пайдаланганды жана өзүм билемдикти токтоткула. Эл силерге ишенбей калды. Бул тууралуу президент Сооронбай Жээнбеков Ош облусу менен Ош шаарынын укук коргоо жана жергиликтүү бийлик өкүлдөрү менен жолугуп жатып айтты.
Президент сот системасында, укук коргоо органдарында жана күч түзүмдөрүндө реформалардын жүрүшү тууралуу маалымат угуп, бул ведомстволордун өзгөрүүлөргө карата даярдыгын текшерди.
Ал жакында өткөрүлгөн Туруктуу өнүктүрүүнүн улуттук стратегиясынын долбоорун талкуулаган жыйын туурасында да эске салды.
"Адамдын кызыкчылыктарына, анын өнүгүшүнө жана мүмкүнчүлүктөрүнө каршы келгендердин баарын жоюш керек, айрыкча сот системасында жана укук коргоо органдарында. Адамдардын кыйынчылыктарын бизнес жасоо үчүн пайдаланганды жана өзүм билемдикти токтоткула. Эл силерге ишенбей калды. Ал эми силердин туура эмес ишиңер, чечимиңер бийликке, президентке көлөкө түшүрүп жатат! Силердин деңгээлде чечиле турган көп арыздар мага келүүдө, анткени силер аларды чечпей жатасыңар", — деди Жээнбеков.
Ошондой эле мамлекет башчысы жетекчилерди балдар бакчаларын реформалоого, балдарды үй-бүлөлөргө кайтарууга же бекитип берүүгө, кары-картаңдарга жардам берүүгө көмөктөшүүгө чакырды.
