БИШКЕК, 13-авг. — Sputnik. Кикбокс боюнча Борбор Азия чемпионатынан кыргызстандык эки спортчу алтын кур тагынып, дагы төртөө жеңүүчү аталды. Бул туурасында Sputnik Кыргызстан маалымат агенттигине курама команданын башкы машыктыруучусу Тахир Муратов билдирди.
Профессионал кикбоксчулар арасындагы AAK-1F версиясы боюнча Борбор Азия чемпионаты 12-августта Өзбекстандын Ангрен шаарында өткөн.
Өлкө атынан жети спортчу катышып, анын экөө алтын кур тагынып, төртөө жеңүүчү аталса, бирөө утулуп калган.
Машыктыруучу Тахир Муратовдун айтымында, мелдештин алкагында үч алтын кур ойнотулса, экөөнү улуттук курама команда утуп алган. Чемпиондук бир наам өзбекстандыктарга буюрган.
1. Арлет Бакытбек уулу (57 кг) — калыстардын чечими менен алтын кур;
2. Шерзод Кабутов (60 кг) — калыстардын чечими менен алтын кур;
3. Сергей Дубов (81 кг) — техникалык нокаут менен жеңүүчү;
4. Аброр Хакимов (67 кг) — калыстардын чечими менен жеңүүчү;
5. Ислам Шарапов (63.5 кг) — калыстардын чечими менен жеңүүчү;
6. Ильяс Чынгызбек уулу (75 кг) — калыстардын чечими менен жеңүүчү;
7. Карабеков Данияр 2:1 эсебинде утулуп калган.
Алтын кур тагынган кикбоксчунун бири Арлет Бакытбек уулу сентябрь айында Италияда өтө турчу дүйнө чемпионатына жолдомо алган, бирок каражаттын жоктугунан улам спортчунун барар-барбасы белгисиз болуп турат.
