Фрунзе — Талас — Фрунзе каттамындагы учак 1969-жылы 28-июнда эртең менен Таласка учуп барган. Ошол эле күнү кеч курун борбор калаага кетип баратып кырсыктаган. Анын ичинде 27 жүргүнчү, сегиз кичинекей бала жана экипаждын беш мүчөсү болуп, бардык 40 киши мерт болгон.
Жарандык авиациянын учагы Таластагы аэропорттон абага көтөрүлөр алдында текшерүүдөн өткөн. Эч кандай техникалык мүчүлүштүк табылган эмес. Учкучтардын ден соолугу да текшерилип, саламатчылыгы жайында экендиги аныкталган. Бирок бир аздан кийин эле экипаж менен байланышууга мүмкүн болбой калган.
Каргашадан кийин атайын комиссия түзүлүп, кырсыктын чоо-жайын бир ай ичинде такталган. Жеринде тергөөчүлөр, прокуратура кызматкерлери, ата мекендик авиациянын өкүлдөрү иштеген. Укук коргоо органдары аэропортто, метеорологиялык кызматта иштегендерди суракка алган. Метеорологдор ал күнү аба ырайы ачык болуп, каттамды ишке ашырууга тосколдуктар болбогондугун айтышкан.
Андан сырткары, адистер самолет кырсыкка кабылганга чейин анын бардык тетиктери жайында болгондугун тактаган.
Комиссия 40 адамдын өмүрүн алып, мамлекетти 29 миң 288 рубль зыянга учураткан авиакырсыктын жыйынтыгын чыгарып, өлкө аймагындагы аэропортторго тиешелүү сунуштарды берген. Алар республикадагы аба майдандардын учуп-конуу тилкесин жакшыртуу, байланыш техникаларын жаңылоо зарылчылыгын айткан.
