БИШКЕК, 25-июн. — Sputnik. Kaktus.media интернет-порталынын журналисти Марат Уралиев аны коюп кеткен айдоочунун ким экени такталганын айтты.
Белгилей кетсек, окуя жекшембиге караган түнү саат 4:20лар чамасында болгон. Рейд учурунда жол кыймылы коопсуздугун камсыздоо башкармалыгынын инспектору Lexus GS автоунаасын токтоткон. Анын айдоочусу өзүн Нурлан деп тааныштырып, Экономикалык кылмыштуулукка каршы күрөшүү мамлекеттик кызматында иштей турганын айтып, протокол түзбөй эле коюуну суранган. Инспектор баш тартканда айдоочу бардык процедуралардан өтүүгө макул болгон. Бирок инспектор четке чыккан кезде учурдан пайдаланып, газды басып журналисти коюп, окуя болгон жерден качып кеткен.
"Кечээ арыз жаздым. Айдоочу ким экени аныкталып, машина айып короого токтотулду. Дарыгерлерге кайрылайын деп турам, бутумдун ооруганы эле болбосо баары жакшы. Ал эми мени коюп кеткен айдоочу Финполдун кызматкери экен", — деди ал.
ЖКККББнын маалымат кызматы бардык материалдар тергөөчүгө берилерин билдирди.
"Ал кармалды. Камакка алынар-алынбасы кийин чечилет. Айдоочу Финполдун кызматкериби же жокпу, аны да тергөө аныктайт", — деп маалымат кызматынан кабарлашты.
Ал эми Финполдон түшүндүрмө алууга мүмкүн болгон жок.
