Көпчүлүк журналисттер билим деңгээлин жогорулатышы керек. Бул тууралуу Молдосеит Мамбетакунов Sputnik Кыргызстан радиосунун "Ийгилик сырлары" уктуруусунда маек куруп жатып билдирди.
Анын айтымында, журналисттердин басымдуу бөлүгү өзү изилдеп жаткан теманы ар тараптан көргөзүп, ачып бере албай жатат.
"Кыргызстанда телеканалдар да, журналисттер да көбөйдү. Бирок, медиа кызматкерлеринин билим деңгээли тандап алган темасын жеткиликтүү ачып берүүгө жетпей жатат. Мисалы, Москванын экономика жаатындагы журналисттери жогорку деңгээлде изилдөө, иликтөө программаларын даярдашат. Ал эми биздин ЖМКларда экономиканы өстүрүүгө багытталган берүүлөр жокко эсе. Биз көпчүлүк учурда саясаттагы маселелерди көбүртүп-жабыртып берип, элди эмгекке чакырбай, экономикалык абалыбызды бийиктеткенге көндүрө албай жатабыз", — деди Мамбетакунов.
Ал ЖМКлар биринчи планга экономиканы, экинчи планга саясатты алып чыгышы керектигин кошумчалады.
