БИШКЕК, 10-май — Sputnik. Экс-каржы министри Ольга Лаврова Кытайдын "Эксим" банкынан ТЭЦти модернизациялоо үчүн алынган 386 миллион долларлык насыяга эмне үчүн англис тилиндеги келишимге кол койгонун айтты.
Депутат Бакирдин Субанбеков экс-министр англис тилиндеги келишимде эмне деп жазылып турганын түшүнүп, түшүнбөгөнүнө кызыкты.
Экс-министр бул келишимдин долбоору өкмөттүн 2013-жылдагы тийиштүү токтому менен макулдашылып бекитилгенин билдирди. Андыктан келишимге кол коюуда ошол учурда иштеп жаткан эл аралык документтерге каршы келбей турганын баса белгиледи.
Эске салсак, Кытайдын "Эксим" банкынан алынган насыялык келишимге ошол учурдагы каржы министри Ольга Лаврова кол койгон.
Бүгүн парламенттин жалпы жыйынында Бишкек ТЭЦтиндеги аварияны жана модернизациялоого кеткен каражаттын сарпталышы боюнча депутаттык комиссиянын корутундусу каралып жатат.
