БИШКЕК, 16-апр. — Sputnik. "Ош" базарындагы өрттөн жабыркап, митингге чыккандардын өкүлдөрү өкмөт үйүнө сүйлөшүү үчүн кирип кетишти.
Бүгүн өкмөт үйүнүн алдына 100гө чукул киши чогулуп, өрт коопсуздугун сактабагандыгы үчүн базардын жетекчисин жазалоо жана чыгымды төлөтүү талабын койгон.
Эскерте кетсек, кырсык 13-апрелге караган түнү болгон. Өрттүн очогу Киев менен Кулиев көчөлөрүнүн кесилишине жакын "Берекет" базарында жайгашкан. ӨКМ базар атайылап өрттөлгөнүн айтып, милиция кылмыш ишин козгоду. 5200 чарчы метр аянтты жалмаган өрт 16 сааттан кийин толук өчүрүлгөн.
Премьер-министр Сапар Исаков жыйын өткөрүп, өрттөн жабыркаган соодагерлерге жардам берүү тапшырмасын берди. Мындан тышкары, кырсыктан жапа чеккендерди атайын түзүлгөн комиссия аныктамай болгон.
