БИШКЕК, 6-апр. — Sputnik. Жогорку Кеңештеги "Республика — Ата-Журт" фракциясы Башкы прокуратуранын 2017-жылда жасаган ишин жактырбай, канааттандырарлык эмес деп тапты. Фракциянын токтомун жаңы шайланган лидер Жыргалбек Турускулов окуду. Аны эки депутаттан сырткары бардык депутаттар колдоого алды.
Депутаттар мындай чечимге сот тутумдарында коррупциялык көрүнүштөрдүн күчөп кетиши, мыйзамдардын так аткарылышы жана мыйзамдуулуктун сакталышы жетишерлик деңгээлде камсыз болбой, кылмыштуулуктун жалпы деңгээли жогорулагандыктан улам кабыл алышкан. Токтомдо айрыкча уюшкан кылмыштуулук күч алганы баса белгиленген.
"Жогорудагы жайгдайларды эске алуу менен бирге башкы прокурор Индира Жолдубаева расмий түрдө чакырылганына карабай фракциянын жыйынына катышпаганын белгилеп, "Республика — Ата-Журт" фракциясы Башкы прокуратуранын 2017-жылы жасаган иштерин канааттандырарлык эмес деп тапты", — деди Турускулов.
Ошондой эле фракциянын чечими Жогорку Кеңештин төрагасына жиберилмей болду.
"Кайсы мекеме жетекчисин чакырып отчетун албайлы, ал мекеменин жетекчисинин, орун басарларынын пикирин укпай туруп, жообун албай туруп канааттандырарлык эмес деп чечим кабыл алуубуз эч кандай моралдык этикалык нормага жатпайт го деп ойлойм", — деди ал.
Жыйында фракциянын токтому добуш берүүгө коюлуп, эки депутаттан башкасынын баары аны колдоого алды.
Белгилей кетсек, парламенттеги "Ата Мекен" фракциясы да Башкы прокуратуранын 2017-жылда жасаган иш аракеттерин жактырбай, канааттандырарлык эмес деп тапкан.
