БИШКЕК, 29-мар. — Sputnik. Россиянын Бишкектеги элчилиги кыргызстандыктар Кемеровонун тургундарына кыйын кезеңде колдоо көрсөткөнү үчүн терең ыраазычылыгын билдирерин дипломатиялык өкүлчүлүктөн маалымдашты.
Дипломатиялык өкүлчүлүк кемероволуктарды колдогон мамлекеттик мекемелерге, эл аралык уюмдарга, коомдук жана саясий бирикмелерге, дин өкүлдөрүнө, билим берүү тармактарына, ЖМК, жаштар уюмдары, ишкерлер, дегеле Россия менен Кыргызстандын жарандарына терең ыраазычылыгын билдирип өткөн.
"Кемероводогу кырсык Россия менен Кыргызстан ар качан биргеликте экенин көрсөттү", — деп элчиликтен белгилешти.
25-мартта Кемерово шаарындагы "Зимняя вишня" деп аталган төрт кабаттуу соода борборунда өрт чыккан. Өрт кантип башталганы видео байкоого түшүп калган.
Бул трагедия Россиядагы эң чоң төрт өрт кырсыктын бири катары эсептелүүдө. 1999-жылы Самарада Ички иштер башкармалыгында тилсиз жоо 57 өмүрдү алып кеткен. 2007-жылы Краснодар аймагындагы карылар үйүндө чыккан өрттөн 63 киши каза тапкан. 2009-жылы Пермь шаарындагы "Хромая лошадь" клубунда чыккан өрттөн 153 адам өмүрү менен коштошкон.
