БИШКЕК, 29-мар. — Sputnik. Азиядагы эң узун үңкүр Кытайдын Гуйчжоу провинциясында жайгашкан. Бул тууралуу Кытайдын Global Times сайты жазып чыкты.
Маалыматка ылайык, 238 чакырымга жеткен Шуанхэ деп аталган үңкүр 100 миллион жыл мурун пайда болгон.
238.48-kilometer Shuanghe Caves in SW China's Guizhou confirmed to be the longest known cave in Asia https://t.co/cLAbHk4mvd pic.twitter.com/c0YVJcElMa
— Global Times (@globaltimesnews) March 26, 2018
Буга чейин аталган үңкүрдүн узундугу 200 чакырым деп эсептелип келген, бирок изилдөөчүлөр дагы 38 чакырымын аныктап чыккандан кийин Шуанхэ ушу кезге чейин узун деп катталган Малайзиядагы Клируотер үңкүрүн артка калтырды.
Жаңы изилдөө дүйнө жүзүнөн чогулган 13 эксперттен турган команда тарабынан жүргүзүлгөн.
"Үңкүрдүн ичинде 143 жай бар, анын 56сы бири-бири менен байланышып турат. Мындан тышкары, жер алдынан өткөн беш дарыя жана 118 агым табылды. Үңкүр 100 миллион жыл мурун пайда болгон. Иликтөөнүн жүрүшүндө жер алдынан жок болгон жаныбарлардын таш болуп катыган сөлөкөттөрү табылган", — деп айтылат маалыматта.
Шуанхэ үңкүрү 1987-жылы ачылып, бир нече жолу изилденген. 2004-жылы Кытай бийлиги ага улуттук геологиялык парк макамын берген.
Ал эми дүйнөдөгү эң узун болуп АКШнын Кентукки штатында жайгашкан 643 чакырымдык Мамонт үңкүрү эсептелинет.
