БИШКЕК, 22-мар. — Sputnik. Казакстандын прокуратурасы Кыргызстандын И.А. жана Түркиянын М.Й. аттуу жарандарын кылмыш жоопкерчилигине тартуу үчүн Кыргызстанга өткөрүп берүү суранычын канааттандырды. Бул тууралуу Башкы прокуратурадан билдиришти.
Маалыматка караганда, аталган жарандар Атырау облусундагы абакта кармалып турушкан.
"И.А. аттуу аял түркиялык М.Й. менен биригип алып өзүнүн бир тууган агасын кордоп өлтүргөн деп айыпталууда. Маркумдун өрттөнгөн сөөгү 2017-жылы Ысык-Көлдөгү Жети-Өгүз районуна караштуу Көл-Кечүү аймагынан табылган", — деп айтылат маалыматта.
Өткөн жылдын 29-сентябрында эки шектүүнү сыртынан камакка алуу чечими чыгарылып, мамлекеттер аралык жана Интерпол аркылуу эл аралык издөөгө алынган.
Шектүүлөр Бишкек шаарынын №1 убактылуу кармоочу жайына которулмай болду.
