БИШКЕК, 2-мар. — Sputnik. Милицияны полицияга өзгөртүү маселеси каралып жатат. Бул тууралуу премьер-министр Сапар Исаков Кыргызстандагы коопсуздук жана кылмышты алдын алуу саясаты аттуу конференция учурунда билдирди.
Анын айтымында, укук коргоочуларды элге жакын кылуу негизги маселе болуп турат.
"Милиция — бул Советтер Союзунан бери келе жаткан милитаристтик авторитардык структура. Ал процесс менен статистикага багытталган. Ал эми полициянын милдети — коомчулук менен иштешүү. Учурда биздин адистер башка өлкөлөрдүн тажрыйбасын изилдеп жатат", — деди Исаков.
Ал ошондой эле өзгөртүүлөргө кошумча каражат керектелгендиктен бул маселени атайын пландын негизинде ишке ашыруу зарылдыгын кошумчалады.
