Кыргызстандык мушкер Бусурманкул Абдубаит уулу М-1 Global Ghallenge 88 турниринин алкагында россиялык атаандашын жеңип алды. Бул тууралуу аталган уюмдун расмий YouTube каналы жарыялады.
Комментаторлордун баамында, Абдубаит уулу менен Дивнич көрөрмандарга турнирдеги эң эле айыгышкан беттештердин бирин тартуулап, эки мушкер тең партерге караганда бокстун ыкмалары менен көбүрөөк иштешкен.
"Дивнич биздин уюмдун мурдагы чемпиону, анын колу сокку урууга жакшы көнүккөнүн билебиз. Ал оңой менен кыргыз спортчусуна ордун берип койбойт. Бирок Бусурманкул да оңой мушкер эмес. Ал грэпплингдин чебери экенине карабай, таамай соккуларды узатып жатты. Эки мушкер үч раунд тизе бүкпөй иштешти. Көрөрмандар ушундай беттешке суусап турган," — деп сыпатташты алар.
Эске сала кетсек, Абдубаит уулу М-1 Global спорттук уюму менен эки жылга келишим түзгөн. Бул спортчунун келишимден кийинки биринчи беттеши болду. Ага чейин ушул эле уюмда эки жолу таймашка чыгып, биринде тең чыкса, экинчисинде бразилиялык Диего Давеллону утуп алган.
Бусурманкул Абдубаит уулу тууралуу кененирээк маалыматты Sputnik Кыргызстан маалымат агенттиги даярдаган маектен окуңуздар.
