БИШКЕК, 16-фев. — Sputnik. Бишкектеги мектептердин бирине баңгизаты таркатылган. Кылмышка шектелип борбор калаадагы окуу жайлардын биринде окуган эки студенти кармалды. Бул тууралуу ИИМден кабарлашты.
ИИМдин Баңгизатты мыйзамсыз сатууга каршы күрөшүү кызматынын өкүлдөрүндө студенттер окуучулар арасында тыюу салынган каражаттарды таратып жүргөндүгү боюнча маалымат болгон.
15-февралда мектептердин биринин аймагынан 21 жаштагы студент кармалган. Аны текшерүү учурунда жанынан 26 грамм гашиш табылган.
Мындан тышкары, кошумча оперативдик иш-чаралардын учурунда 20 жаштагы студент кармалган. Анын жанынан 15 грамм, үйүнөн 7 грамм гашиш табылган.
Аталган факты боюнча Кылмыш жаза кодексинин 246-247-беренелери (баңгизатын мыйзамсыз жүгүртүү, сатуу, сактоо) боюнча кылмыш иши козголду.
Буга чейин 8 килограмм гашиш менен ИИМдин пенсионери кармалган болчу.
