ЖАЛАЛ-АБАД, 12-фев. — Sputnik. Аксы районунун Кербен шаарында жол кырсыгына кабылган милиционерге карата кылмыш иши козголуп, камакка алынды. Бул тууралуу облустук милициянын маалымат катчысы Мыктыбек Турдубеков Sputnik Кыргызстан агенттигине билдирди.
Эске сала кетсек, 10-февраль күнү саат 17:00 чамасында Аксы районунун Кербен шаарында милиционер башкарып бараткан унаа жолдон тайгаланып, төрт адамды коюп кеткен. Эки адам каза болуп, дагы экөө ооруканага жаткырылган. Айдоочунун соо экендигин райондук оорукананын наркология бөлүмү тастыктап, ал эми бул факты боюнча ИИМдин Өздүк коопсуздук кызматы териштирүү баштаган.
"Аксы РИИБдин убактылуу кармоочу жайында иштеген милиция кызматкерине карата Кылмыш жаза кодексинин 281-беренесинин негизинде кылмыш иши козголду. Соттун чечими менен ал эки айга камакка алынды. Учурда тергөө иштери жүрүп жатат", — деди Турдубеков.
Аксы райондук аймактык ооруканасынын башкы дарыгери Медербек Осмонов билдиргендей, жол кырсыгына кабылган мугалимдердин бири 35 жаштагы Мукадас Ажибаева комада жатат, абалы оор. Экинчи жабырлануучу Гүлмира Таштановага медициналык жардам көрсөтүлүп, ооруканадан чыгарылды.
