БИШКЕК, 31-янв. — Sputnik. "Улуттук энергетикалык холдинг компаниясынын" жетекчиси Айбек Калиев депутат Аида Касымалиеванын суроосуна жооп берип жатып, 39 миң сом айлык аларын билдирди.
Шаршембиде, 31-январь күнү Сапар Исаков менен өкмөттүн мүчөлөрү ТЭЦтеги кырдаал боюнча отчет берүү үчүн парламентке келишти. "Республика — Ата-Журт" фракциясынан депутат Кенжебек Бокоев премьер-министрдин отставкага кетүүсүн талап кылды.
Эл өкүлү Аида Касымалиева ТЭЦтин жетекчиси менен катардагы энергетиктердин маянасына кызыкты.
"Мен 39 миң сом алам. Ал эми ТЭЦтин жетекчисинин айлыгы 27 миң сом. Буу казандарда иштегендер эң аз дегенде 16-17 миң сом алышат", — деди Калиев.
30-январь күнү таңкы саат 4:40да Бишкек ТЭЦиндеги №3 блок ишке киргенин "Улуттук энергетикалык охолдинг компаниясы" ААКтын маалымат кызматы кабарлаган. Ага ылайык жаңы блок 150 МВт энергияны иштеп чыгып, +88 градуска чейин жылуулук берери айтылган. 30-январдан тарта көп кабаттуу үйлөрдөгү батареялар жылып баштаганын тургундар социалдык тармактарга жазышкан.
