БИШКЕК, 19-янв. — Sputnik. Нарын облусунун Ат-Башы районундагы Калинин айылында тургундар үчүн муз аянтчасы ачылды. Аны ачкандардын бири Тазабек Кабыл уулу Sputnik Кыргызстан агенттигине билдирди.
Анын айтымында, айылдашы Турганаалы Манас уулу менен биргеликте 10-декабрдан тарта муз тоңдуруп, даярдыктарды көрүп башташкан.
"26-декабрда муз аянтын айылдык депутаттардын катышуусу менен ачтык. Жашоочулар аябай жакшы кабыл алышты. Каникул учурунда окуучулардын бардыгы келип суукка карабай муз тээп жатышты. Азыр окуу башталгандан бери келгендер бир аз азайды, ошентсе де келип коньки тээп жаткандар арбын эле", — деди ал.
"Былтыр Кызыл-Туу айылына барганда муз аянтчасын көргөм. Турганаалы Манас уулу менен сүйлөшүп биз да ачалы деп чыгынып, ачтык. Муз аянтына жарык жана башка иштерди жасоого 3-4 миң сомдой кетти. Ал эми конькилерди Бирлик айылынан 15 миң сомго сатып алдык. Алар да былтыр муз аянтчасын ачып, быйыл жасашпаптыр", — деди ал.
Муз аянтчасында коньки тебүүнүн баасы чоң кишилер үчүн саатына 50 сом, мектеп жашындагы балдар үчүн 30 сом.
