БИШКЕК, 12-дек. — Sputnik. ӨКМ Ош шаарындагы май алмаштыруучу жай менен техникалык тейлөө станциясынан чыккан өрт эмнелерди жок кылганын айтып берди.
Эскерте кетсек, кырсык Разаков көчөсүндөгү "Манас-Ата" кичирайонунда саат 21.05те чыккан. Окуя болгон жерге 7 өрт өчүрүүчү бөлүм жана бир куткаруучу унаа тартылган. Алдын ала маалымат боюнча, жалын 684 чарчы метр аянтты жалмап кеткен.
Анын кесепетинен май алмаштыруучу жайдын 180 чарчы метри, май куюлган 200 литрлик челектер күйгөн. Ал эми техникалык тейлөө станциясынын 144 чарчы метри, ичи, унаалардын запас бөлүктөрү жана дөңгөлөктөр жок болгон. Мындан тышкары, ошол жерде жайгашкан дагы бир май алмаштыруучу жайдын чатырынын 360 чарчы метри, май куюлган 200 литрлик челектер күйүп кеткен.
ӨКМдин маалыматы боюнча өрт шейшемби күнү саат 01.18де толугу менен өчүрүлгөн. Кырсыктын себептери учурда такталып жатат.
