БИШКЕК, 4-дек. — Sputnik. Артта калган аптада шоу бизнес өкүлдөрүнүн башына баш кошулду. Алгач учурдун жаш актрисасы Элина Абай кызы кикбоксер Кумар Жалиевге турмушка чыгып үлпөт тою өтсө, ишемби күнү эстрада ырчысы Омар Диана атуу сүйүүктүсүнө баш кошуп, бойдокчулук менен кош айтышты. Sputnik Кыргызстан агенттиги ушул жана башка сүрөт, видеолор топтомун сунуштайт.
1. Эстен тандырган эки аялдуулук. Апта башында эле Чубак ажы Жалилов экинчи аял алганын ачыктап, башкаларды да көп аялдуулукка үндөдү делген видео интернет айдыңына жарыяланды. Аалымдын бул кадамы коомчулукта кызуу талаш-тартышка жем таштады. Бир тарабы мыйзамды аттап өттү десе, экинчи жагы экс-муфтийдин кадамын кубаттап чыккан. Бул иштин аягы азырга чейин тыйылбай укук коргоо органдары да аралашты.
2. Чакан мамлекет курулду. Жигиттердин арзуусуна айланган белгилүү актриса Элина Абай кызы атактуу кикбоксер Кумар Жалиевдин колун кармап турмуш жолуна аттанды. Бири-бирине куп жарашкан түгөйлөргө күч менен сулуулук бирикти деп суктанып карашууда. Бул сүрөттү Кумар Жалиев тойдон кийин жүктөгөн.
3. Омар бойдокчулук менен коштошту. Ишемби күнү Бишкектеги ресторандардын биринде ырчы Омар үлпөт тоюн өткөрдү. Тойго катышкан санаалаштары Instagram тармагына тынбай сүрөт, видео жүктөшүп, кеченин кандай өтүп жатканы менен элди кабардар кылып койду. Бул видео эки жаштын бийинен тартылган.
4. Жерде жаткан баланы атасы ичке тепти. Өз улууна мыкаачылык кылган атанын видеосу интернетке тарады. Соцтармак колдонуучулары "айбанат дагы өз баласына мындай мамиле кылбайт" деп жакасын кармашууда. Уулун тепкен атаны милиция ошол күнү эле кармаган.
5. Жибиген президенттер. Сооронбай Жээнбеков, Владимир Путин жана Нурсултан Назарбаев. Үч президент жылуу маанайда басып бара жатышат. Бул солгундай түшкөн кыргыз-казак мамилесинин жандануусунан кабар берди. Күтүлгөндөй эле Кыргызстан менен Казакстандын лидерлери бир мунасага келип чек аралар адаттагыдай тартипте иштей баштады.
6. Президент демекчи… Москвада жүргөн тунгуч президент Аскар Акаев катышкан тойдо эстрада ырчысы Алмаз Шаадаев ырдап келгенин ырчы өздүк баракчасына жарыялады. Анда ал экс-президентке Кыргызстандын саламын айтып, эгемендүүлүктүн алгачы жылдары өлкөнү башкарып турганына ыраазычылыгын билдирген.
7. Айылдык келин шаарга келгенде… Буга чейин жиликти микрофон, боз үйдү сахна кылып келиндин образында бийлеген Сайкал Жумалиева кандайдыр бир кечеде чимириле бийлеген видеосун жарыялады. Мунусунда ал шаардык кыздын образын жараткан.
8. Айылдык баланын ажайып бийи. Ал эми бул кыргыздын айылдык баласы тойдун көркүн ачты. Көңүлү шат жыргап бийлеп жатат. Минтип бийлөө баарынын эле колунан келе бербесе керек.
9. Элдин оозун ачырган кичинекей манасчы. Кытайдагы таланттар шоусунда этникалык кыргыз бала "Манас" эпосунун үзүндүсүн кыргыз-кытай тилдеринде айтып, элге жакшы маанай тартуулады. Ал Манас айтуу менен гана чектелбестен, комузда кол ойнотуп, кара жорго бийлеген. Өнөрүң өркүндөй берсин!
