БИШКЕК, 10-ноя. — Sputnik. Филиппиндин президенти Родриго Дутерте Азия-Тынч океан экономикалык кызматташтыгы саммитине катышып жатып 16 жашында бирөөнү бычактап өлтүргөндүгүн айтты. Бул тууралуу Sputnik Түркия агенттиги жазып чыкты.
"Жаш кезимде бир нече жолу түрмөгө отургам. Көп мушташчу элем. Атургай 16 жашымда бирөөнү бычактап өлтүргөм",— деп айтты Дутерте.
Ал ошондой эле Филиппиндин маңзатка каршы саясатын сындаган БУУнун баяндамачысы Агнес Каламарды көргөн жеринен токмоктой турганын да билдирди.
"Менимче президент тамашалап койду. Ал чет өлкөдө жашаган филиппиндиктер менен жолугушканда ушинтип азилдешип коет", — деди маалымат катчы.
Филиппин президенти буга чейин да адам өлтүргөндүгүн мойнуна алганын дүйнөлүк ЖМКлар жазып келет.
Өлкөнүн жүргүзгөн саясатына ылайык, Дутерте президент болгондон бери баңгизатка каршы операцияларда 4 миңге жакын адам жок кылынганы дагы айтылды.
