Билим берүү мекемелери ата-энелерди демөөрчү кылбастан, бюджеттен сырткары финансылык булактарды издөөгө акысы бар, мыйзам буга жол берет. Бул туурасында Тынчтык инновациялары боюнча Булан институтунун Борбор Азия программасынын жетекчиси, конфликтолог жана журналист Чолпон Орозобекова Sputnik Кыргызстан агенттигине баяндама туурасында айтып берди.
Эске сала кетсек, аталган институт "Мектептин бюджеттен жана бюджеттен сырткары каржыланышы: Ата-энелерден акча чогултуу муктаждыкпы же коррупциябы?" деп аталган баяндама-иликтөөнү жарыялады.
"Мыйзам боюнча билим берүү мекемелердин бюджеттен сырткары финансылык булактарды издөөгө акысы бар. Учурда мектептер ата-энелерди күчкө салып эле негизги демөөрчү кылып алды. Анын ордуна мектептер бюджеттик долбоорлорду түзгөндү өздөштүрүп, демөөрчүлөрдү эл аралык уюмдар арасынан, коомдук уюмдардан, бизнес компаниялардан, элчиликтерден издегенге үйрөнүшү керек", — деди Орозобекова.
Булан институту эки айлык иликтөөсүнөн кийин корутунду да чыгарып, бир нече сунуштар айтылган.
Учурда Кыргызстанда 2 236 мектеп бар. Анда 1 миллион 73 миң окуучу окуп, 79 миңге чукул мугалим иштеп жатат.
